Dünyanın ikinci ən böyük iqtisadiyyatı olan Çin nəhayət ki, son üç ilə damğa vuran və iqtisadi artımı buxovlayan deflyasiya spiralından qurtulmağı bacarıb. ANZ bankının son analitik hesabatına görə, ölkədə istehlak qiymətləri indeksi uzun fasilədən sonra müsbət zonaya keçsə də, ekspertlər bu artımı “pis inflyasiya” kimi xarakterizə edirlər. Bunun əsas səbəbi qiymət artımının daxili tələbatın canlanmasından deyil, birbaşa xaricdən idxal edilən enerji və xammal xərclərinin kəskin yüksəlməsindən qaynaqlanmasıdır.
Mütəxəssislər bildirirlər ki, artan enerji xərcləri istehsalçıların mənfəətini sıxsa da, bu vəziyyət iqtisadiyyatı kiçildən deflyasiyadan daha yaxşı ssenari hesab olunur. Hazırda rəsmi Pekin daxili bazarda sabitliyi qorumaq üçün strateji ehtiyatlara müraciət edir, lakin qlobal enerji bazarlarındakı qeyri-müəyyənlik Çin sənayesi üçün əsas risk faktoru olaraq qalmaqdadır.
