Dünyanın ən yüksək səviyyəli mərkəzi bank rəhbərləri ABŞ hökumətinin pul-kredit siyasəti ilə bağlı Federal Ehtiyat Sistemini (Fed) təzyiq altına almağa çalışdığını deməsindən sonra Fed sədri Cerom Pauellə açıq şəkildə həmrəylik nümayiş etdirirlər.
Çərşənbə axşamı günü dünya üzrə 10 mərkəzi bank qurumunun rəhbərləri tərəfindən birgə imzalanmış məktubda Pauellin dürüstlüyü müdafiə olunub və o, “birgə çalışdığı hər kəs tərəfindən yüksək hörmət qazanan, nüfuzlu həmkar” kimi xarakterizə edilib.
“Biz Federal Ehtiyat Sistemi və onun sədri Cerom H. Pauellə tam həmrəylik nümayiş etdiririk”, – məktubda deyilir.
Məktubda vurğulanır ki, mərkəzi bankların müstəqilliyi qiymət sabitliyi, maliyyə sabitliyi və iqtisadi sabitliyin əsas dayağıdır və bu müstəqilliyin qorunması vacibdir:
“Mərkəzi bankların müstəqilliyi xidmət etdiyimiz vətəndaşların maraqları naminə qiymət, maliyyə və iqtisadi sabitliyin təməl sütunudur. Hüququn aliliyinə və demokratik hesabatlılığa tam hörmət çərçivəsində bu müstəqilliyin qorunması kritik əhəmiyyət daşıyır. Sədr Pauell öz mandatına sadiq qalaraq, dürüstlük və ictimai maraqlara sarsılmaz bağlılıqla xidmət edib.”
Bəyanatı Avropa Mərkəzi Bankının sədri Kristin Laqard, İngiltərə Bankının rəhbəri Endryu Beyli, eləcə də İsveç, Danimarka, İsveçrə, Avstraliya, Kanada, Cənubi Koreya və Braziliyanın mərkəzi bank rəhbərləri, həmçinin Beynəlxalq Hesablaşmalar Bankının (BIS) rəhbərliyi imzalayıb.
Bu məktub Pauellin bazar günü Federal Ehtiyat Sisteminin ABŞ Ədliyyə Nazirliyi tərəfindən münsiflər heyətinin (grand jury) çağırış vərəqələri ilə üzləşdiyini açıqlamasından sonra yayımlanıb. Bu addım Tramp administrasiyası ilə Fed arasında faiz dərəcələrinin istiqaməti ilə bağlı davam edən mübahisədə növbəti eskalasiya kimi qiymətləndirilir.
“Heç kim — o cümlədən Federal Ehtiyat Sisteminin sədri — qanundan yuxarı deyil”, – Pauell bazar günü video müraciətində deyib.
“Lakin bu presedentsiz addım administrasiyanın davamlı təhdidləri və təzyiqləri fonunda qiymətləndirilməlidir.”
Bazar ertəsi günü ABŞ-da iqtisadiyyat və pul siyasəti sahəsində nüfuzlu şəxslər, o cümlədən Fed-in hazırda yaşayan üç keçmiş sədri və beş keçmiş maliyyə naziri də Pauellə dəstək bəyanatı yayıblar.
Həmin bəyanatda aparılan istintaq “Fed-in müstəqilliyini sarsıtmaq məqsədi daşıyan presedentsiz prokurorluq hücumu” kimi qiymətləndirilib.
“Bu, gücünü hüququn aliliyindən alan və iqtisadi uğurunun təməlində bu prinsip dayanan ABŞ üçün qəbuledilməzdir”, – deyə bəyanatda qeyd olunub.
