BBN.az xəbər verir ki, ABŞ Federal Ehtiyat Sisteminin (FED) İdarə Heyətinin üzvü Stephen Miran Donald Tramp administrasiyasının tətbiq etdiyi ticarət tariflərinin ABŞ istehlakçıları üçün gözlənildiyi qədər ağır nəticələr doğurmadığını bildirib.
Miranın sözlərinə görə, mövcud iqtisadi məlumatlar tariflərin əsas maliyyə yükünü amerikalılar deyil, xarici istehsalçılar və şirkətlərin daşıdığını göstərir. O, bu fikirləri Afinada keçirilən Delphi İqtisadi Forumunda çıxışı zamanı səsləndirib.
FED rəsmisi vurğulayıb ki, tariflər idxal olunan məhsulların qiymətlərinə birbaşa və tam şəkildə ötürülmür. Bu isə, onun fikrincə, ABŞ daxilində inflyasiya təzyiqlərinin məhdud qalmasına kömək edib. Miran qeyd edib ki, tariflərin inflyasiyada mümkün “həddən artıq artım” (overshoot) riski FED tərəfindən yaxından izlənilir.
Reuters-in məlumatına görə, hazırda ABŞ Ali Məhkəməsi tariflərin hüquqi əsaslarını nəzərdən keçirir və bu siyasətin gələcəkdə ləğv oluna biləcəyi də istisna edilmir. Bu isə ticarət və monetar siyasət baxımından əlavə qeyri-müəyyənlik yaradır.
Qeyd olunur ki, Miranın açıqlamaları bir sıra iqtisadi araşdırmalarla ziddiyyət təşkil edir. Həmin araşdırmalarda tariflərin real yükünün ABŞ istehlakçıları və idxalçılar tərəfindən ödənildiyi göstərilir. Bu baxımdan FED rəsmisinin mövqeyi iqtisadçılar arasında müzakirələrə səbəb olub.
Xatırladaq ki, Stephen Miran ötən il Prezident Donald Trump tərəfindən FED-in İdarə Heyətində yaranmış gözlənilməz vakansiyanı doldurmaq üçün təyin edilib.
