“Golden Pay”in əməliyyat gəlirləri 6% azalıb

1

“QoldenPey” ASC (Hesab.az) 2023-cü ili 2,2 milyon manat xalis mənfəətlə başa vurub. Bu isə 2022-ci illə müqayisədə 2,3% çoxdur.

BBN.az bu barədə şirkətin audit hesabatına istinadən xəbər verir.

Hesabata əsasən, ötən il “Golden Pay”in cəmi gəlirləri 17% artaraq 13,1 milyon manata çatıb. Satışların maya dəyəri isə 19% artımla 8.94 milyon manata yüksəlib. Nəticədə şirkətin ümumi mənfəəti 4,15 milyon manata bərabər olub ki, bu da 2022-ci ilə nisbətən 0,9% çoxdur.

Bununla belə, şirkətin əməliyyat gəlirləri 6% və ya 162 min manat azalaraq 2,53 milyon manata enib. 2022-ci ildə bu rəqəm 2,69 milyon manat təşkil edib. Bu isə “Golden Pay”in inzibati xərclərini 16% və ya 224 min manat artırması ilə bağlı olub. Belə ki, ümumi və inzibati xərclər 2022-ci ildəki 1,39 milyon manatdan ötən il 1,61 mln. manata kimi artırılıb.

Şirkətin əldə etdiyi xalis mənfəət kapital balansındakı bölüşdürülməmiş mənfəətini 6.24 milyon manata yüksəlib. Nəticədə ASC-nin cəmi kapitalı 49% artaraq 6,81 milyon manata yüskəlib. Hesabat dövründə şirkətin cəmi aktivləri 31,8% artaraq 8,7 milyon manata, cəmi öhdəlikləri isə 5,3% azalaraq 1,9 milyon manata bərabər olub.