“Goldman Sachs” 2026-cı il üçün xammal bazarları üzrə qiymət proqnozlarını əks etdirən analitik qeyd dərc edib. Bankın baza ssenarisinə əsasən, qızılın qiyməti ilin sonunadək 14% artaraq bir unsiya üçün 4 900 dollara çata bilər. Analitiklər bildirirlər ki, fərdi investorlar tərəfindən investisiyaların daha geniş şəkildə diversifikasiya olunması fonunda bu proqnozun yuxarı istiqamətdə yenilənməsi riski də mövcuddur.
Qeyd olunur ki, qızıla olan tələbi mərkəzi bankların struktur olaraq yüksək səviyyədə qalan marağı və ABŞ Federal Ehtiyat Sisteminin faiz dərəcələrini mərhələli şəkildə azaltması dəstəkləyəcək. Bank qızıl üzrə uzunmüddətli mövqelərin saxlanılması tövsiyəsini qüvvədə saxlayır. Qeydin dərc edildiyi vaxt qızılın spot qiyməti bir unsiya üçün 4 334,93 dollar təşkil edib.
Bankın proqnozuna görə, 2026-cı ildə misin qiyməti metrik ton üçün 11 400 dollar səviyyəsində sabitləşəcək. Bu qiymətləndirmə tariflərlə bağlı qeyri-müəyyənliyin 2026-cı ilin ortalarına qədər davam edəcəyi və ABŞ-nin 2027-ci ildə təmizlənmiş misə tariflər tətbiq edə biləcəyi ehtimalına əsaslanır.
“Goldman Sachs” misin uzunmüddətli perspektivdə əsas sənaye metalları arasında “sevimli” olaraq qalacağını bildirir. Buna səbəb kimi elektrikləşmə prosesinin struktur olaraq güclü artım nümayiş etdirməsi və mədənlərdən mis tədarükünün ciddi məhdudiyyətlərlə üzləşməsi göstərilir. London Metal Birjasında misin qiyməti metrik ton üçün 11 721,50 dollar olub. Keçən həftə qiymət 11 952 dollarla rekord səviyyəyə çatıb.
Bank Brent və WTI markalı neftin qiymətlərinin 2026-cı ildə daha da azalacağını proqnozlaşdırır. Hesabata əsasən, 2026-cı ildə bu markalar üzrə orta qiymətlər müvafiq olaraq bir barel üçün 56 və 52 dollar səviyyəsində gözlənilir. Analitiklər bildirirlər ki, neft bazarında tarazlığın bərpası üçün qiymətlərin enməsi zəruri olacaq.
“Goldman Sachs” gözləyir ki, neft qiymətləri 2026-cı ilin ortalarına yaxın minimum həddə çatacaq. Bu dövrdə bazarlar tarazlığın bərpa olunacağını gözləməyə başlayacaq. Qiymətlərin azalması gündəlik 1,2 milyon barel həcmində sabit tələbin artımı, Ukraynadakı münaqişə və sanksiyalar səbəbindən Rusiyadan tədarükün azalması, eləcə də OPEC-ə daxil olmayan ölkələrdə hasilatın zəifləməsi ilə əlaqələndirilir.
Bank 2026–2027-ci illər üzrə proqnozlarda neft qiymətləri üçün aşağı istiqamətli risklərin üstünlük təşkil etdiyini bildirir. Bununla yanaşı, 2027-ci ilin dördüncü rübündə bazarda yenidən defisit ehtimalının gündəmə gəlməsi fonunda qiymətlərin artması da istisna edilmir. Proqnoza əsasən, 2028-ci ilin sonuna qədər Brent və WTI markalı neftin qiymətləri müvafiq olaraq 80 və 76 dollara çata bilər.
Təbii qaza gəldikdə isə, bank 2026-cı ildə Avropada TTF mexanizmi üzrə qazın qiymətinin meqavat-saat üçün 29 avro, 2027-ci ildə isə 20 avro olacağını gözləyir. ABŞ-də qaz qiymətlərinin isə hasilatın artımını stimullaşdıracağı qeyd olunur: 2026-cı ildə milyon Britaniya istilik vahidi üçün 4,60 dollar, 2027-ci ildə isə 3,80 dollar səviyyəsində proqnozlaşdırılır.
Analitiklər həmçinin ABŞ-də elektrik enerjisi istehsalında ehtiyat güclərin daha da azalacağını bildirirlər. Bu vəziyyət elektrik enerjisinə tələbin sürətli artımı və kömürlə işləyən elektrik stansiyalarının istismardan çıxarılmasının bərpa olunan enerji və qaz əsaslı istehsalın artımını üstələməsi ilə izah olunur.
Nəticədə, ABŞ-nin elektrik enerjisi bazarlarında kəskin qiymət artımı və hətta elektrik kəsintiləri riski yaranır. Bu risk xüsusilə məlumat mərkəzlərinin sürətlə artdığı yerli bazarlarda daha yüksək qiymətləndirilir. Qeyd olunur ki, ABŞ-də fəaliyyət göstərən bütün məlumat mərkəzlərinin 72%-i ölkə ərazisinin cəmi 1%-ni təşkil edən dairələrdə cəmləşib.
