Hindistanın əsas fond indeksləri cümə günü yüksəlişlə ticarət olunub. BSE Sensex 200 bənddən çox artaraq yüksəlib, NSE Nifty 50 isə 25 700 səviyyəsini keçib.
Artım əsasən İT sektorunda qeydə alınan yüksəliş hesabına baş verib. Infosys şirkətinin üçüncü rüb üzrə gözləntiləri üstələyən maliyyə nəticələri və illik gəlir proqnozunu yüksəltməsi bazarda müsbət əhval-ruhiyyə yaradıb. Wipro və Tech Mahindra səhmləri təxminən 2% bahalaşıb.
Qeyd edək ki, Hindistan fond bazarı cümə axşamı bələdiyyə seçkiləri ilə əlaqədar ticarət tətilinə görə bağlı olub. Son ticarət sessiyasında – çərşənbə günü isə indekslər ABŞ tarifləri ilə bağlı narahatlıqlar və xarici investorların satışları fonunda geriləmişdi.
Çərşənbə günü ticarətin yekununda:
Sensex 245 bənd (-0,29%) azalaraq 83 382,71 bənd,
Nifty 50 isə 66,7 bənd (-0,26%) enərək 25 665,60 bənd səviyyəsində bağlanmışdı.
Analitiklərin fikrincə, bazarda əsas diqqət şirkətlərin üçüncü rüb maliyyə nəticələrinə yönəlib və yaxın dövrdə indekslərin hərəkəti əsasən korporativ hesabatlardan asılı olacaq.
