Hindistanın iqtisadi artımı kəskin azalıb

Dünyanın ən böyük iqtisadiyyatlarından biri olan Hindistan ötən rüblərdən fərqli olaraq bu rüb yüksək iqtisadi artıma nail ola bilməyib. Belə ki, 2020-ci ilin birinci rüb üzrə makroiqtisadi göstəricilərə əsasən, Hindistanın iqtisadi artımı ötən ilin müvafiq dövrü ilə nisbətdə 2.6% azalaraq 3.1% olub. Bu göstərici, ölkənin son 8 ildə əldə etdiyi ən aşağı iqtisadi artım göstəricisi olsa da, proqnozları (2.1%) üstələyə bilib. 2020-ci il üzrə illik iqtisadi artım proqnozu isə 5%-dən 4.2%-ə endirilib.

Statistikaya sektorlar üzrə nəzər salsaq, ötən ilin birinci rübü ilə müqayisədə birinci rübdə istehsalat sektorunun 1.4%, tikinti sektorunun isə 2.2% gerilədiyini müşahidə edə bilərik. Kənd təsərrüfatında 5.9%, mədənçıxarma sənayesində isə 5.2%-lik artım qeydə alınıb. Koronavirus pandemiyasının sürətlə yayılmasına baxmayaraq, xidmət (2.6%) və maliyyə (2.4%) sektorunda da inkişaf qeydə alınıb.

© Materiallardan istifadə edərkən hiperlinklə istinad olunmalıdır