Niderlandın ən böyük maliyyə qurumlarından biri olan “ING Group” Azərbaycan iqtisadiyyatı ilə bağlı inflyasiya proqnozlarını yenidən nəzərdən keçirib və artıma doğru dəyişiklik edib.
BBN.az xəbər verir ki, maliyyə qrupunun yenilənmiş proqnozlarına əsasən, 2025-ci il üzrə inflyasiya gözləntisi əvvəlki 5,3%-dən 5,4%-ə, 2026-cı il üçün isə 5,1%-dən 5,3%-ə qaldırılıb. 2027-ci il üzrə proqnoz isə 8,9% səviyyəsində müəyyən edilib.
Bundan əlavə, “ING Group” 2025–2026-cı illər üzrə rüblük inflyasiya göstəricilərini də artırıb. Belə ki, bu ilin dördüncü rübü üçün inflyasiya proqnozu 4,8%-dən 5,1%-ə, 2026-cı ilin birinci rübü üzrə 4,9%-ə, ikinci rüb üzrə 5,1%-ə, üçüncü rüb üzrə 5,3%-ə, dördüncü rüb üzrə isə 5,7%-ə yüksəldilib.
Azərbaycan üzrə inflyasiya ilə bağlı digər beynəlxalq təşkilatların da proqnozları mövcuddur. İqtisadiyyat Nazirliyi bu il ölkədə orta illik inflyasiyanı 5,1%, 2026-cı ildə isə 4,3% səviyyəsində gözləyir. Azərbaycan Mərkəzi Bankı (AMB) isə 2025-ci ildə inflyasiyanın 5,5%, 2026-cı ildə isə 3,8% olacağını proqnozlaşdırır.
Digər beynəlxalq qurumların proqnozları isə aşağıdakı kimidir:
-
BMT: 2025-ci ildə 3,6%, 2026-cı ildə 3,1%;
-
Dünya Bankı: 2025–2026-cı illər üçün 2,3%;
-
Beynəlxalq Valyuta Fondu (IMF): 2025-ci ildə orta illik inflyasiya 5,7%, illik inflyasiya 5,2%; 2026-cı ildə 4,5%; 2027–2029-cu illərdə isə 4%;
-
S&P Global və Moody’s: 2025-ci ildə 4%, 2026-cı ildə 3%;
-
Fitch Ratings: 2025-ci ildə 5,3%, 2026-cı ildə 4,6%.
