Böyük Britaniyada İngiltərə Bankı (Bank of England) əsas uçot dərəcəsini cümə axşamı 0,25 faiz bəndi azaldaraq 4%-ə endirib. Bu barədə xarici KİV-lər məlumat yayıb.
BBN.az xəbər verir ki, bu, Bankın ötən ilin avqust ayından bəri həyata keçirdiyi beşinci faiz endirimidir. Həmin tarixdən etibarən siyasətçilər uçot dərəcəsini 5,25% səviyyəsindən – son 16 ilin ən yüksək göstəricisindən – aşağı salmağa başlamışdılar.
Hazırda əsas faiz dərəcəsi 2023-cü ilin mart ayından bəri ən aşağı səviyyəyə enib. Bu göstərici ipoteka kreditləri, eləcə də istehlakçı və biznes kreditləri üçün əsas göstərici rolunu oynayır.
Bankın bu qərarı iqtisadi artımın zəiflədiyi bir dövrdə iqtisadiyyatı stimullaşdırmaq məqsədi daşıyır. Maliyyə bazarlarında bu addım geniş şəkildə gözlənilirdi.
Mütəxəssislərin fikrincə, İngiltərə Bankı inflyasiyaya nəzarət və iqtisadi dayanıqlığı qorumaq üçün balanslı siyasət aparmağa çalışır. Eyni zamanda, artmaqda olan vergilər və ABŞ Prezidenti Donald Trampın qlobal “ticarət müharibəsi” ilə bağlı siyasəti də iqtisadi artım tempinə mənfi təsir göstərə biləcəyi üçün diqqətlə izlənilir.
