İRİA-nın təşəbbüsü ilə İsrailin bir sıra aparıcı şirkət nümayəndələri Azərbaycanda səfərdədir!

İnnovasiya və Rəqəmsal İnkişaf Agentliyi ilə İsrailin “FinCom.Co”, “Raycom”, “CySource” və “Sensorz” şirkətlərinin, habelə “AnD Ventures” vençur fondunun nümayəndələri arasında görüş baş tutub.

İsrailli qonaqlarla görüşlərdə İRİA-nın sədr əvəzi Inara Valiyeva, sədrin müşaviri Shahin Aliyev, Beynəlxalq Biznesin İnkişafı şöbəsinin müdiri Loukas Tzitzis və İnnovasiya üzrə rəhbər Igor Ovcharenko iştirak edib.

Görüş zamanı Texnopark rezidentliyi haqqında qanunun yaratdığı üstünlüklər və Avrasiya bazarının İKT potensialından yararlanmaqda Azərbaycanın doğru seçim olması haqqında məlumat verilib. Bildirilib ki, İRİA-nın dəstəyi ilə rezidentlik hüququ əldə etmək istəyən şirkətlərin Azərbaycanda filial və ya təmsilçilik təsis etmələri üçün müvafiq şərait mövcuddur.

Görüşlər əsnasında, həmçinin İsrail şirkətlərinin nümayəndələrinin Azərbaycandakı kadr potensialı, yerli və Avrasiya ekosistemindəki mövcud imkanlar haqqında sualları da cavablandırılıb.

İsrailli nümayəndə heyəti Azərbaycanın ümumi İKT mühiti ilə tanışlıqdan və müsbət nəticələnən işgüzar görüşlərdən məmnun olduqlarını ifadə ediblər.