Azərbaycanda səfərdə olan Türkiyənin “TÜMKİAD” İş adamları və Girişimçilər Dərnəyinin prezidenti Nihat Tanrıkulun rəhbərlik etdiyi nümayəndə heyəti Kiçik və Orta Biznesin İnkişafı Agentliyində (KOBİA) olub.
Qeyd edək ki, 2017-ci ildə yaradılmış TÜMKİAD Türkiyənin iş adamlarının birliyidir və sıralarında iqtisadiyyatın 27 sektoru üzrə 350-dən çox şirkəti birləşdirir.
Agentliyin İdarə Heyəti sədrinin birinci müavini Natiq Həsənovla keçirilmiş görüşdə Nihat Tanrıkulu səfərin məqsədinin Azərbaycanla həmrəylik nümayiş etdirmək olduğunu vurğulayıb, TÜMKİAD iş adamları adından qələbə münasibətilə ölkəmizi təbrik edib və Azərbaycana dəstək üçün TÜMKİAD-ın bütün imkanlarını cəlb etməyə hazır olduqlarını bildirib.
KOBİA-nın İdarə Heyəti sədrinin birinci müavini Natiq Həsənov ölkəmizlə həmrəyliyə və bu məqsədlə təşkil olunmuş səfərə görə nümayəndə heyətinə təşəkkürünü bildirib, KOBİA-nın fəaliyyəti və KOB-lara göstərilən dəstək, KOB sahəsində Türkiyənin müvafiq qurumları ilə əməkdaşlıq, eyni zamanda Azərbaycanın biznes və investisiya imkanları, o cümlədən işğaldan azad olunmuş ərazilərimizin zəngin iqtisadi və investisiya potensialı barədə məlumat verib, birgə əməkdaşlığa dair fikirlərini bölüşüb.
Görüşdə həmçinin, ölkələrimiz arasında iqtisadi-ticarət əlaqələrinin genişləndirilməsi, o cümlədən işğaldan azad olunmuş Azərbaycan ərazilərində yenidənqurma və bərpa işlərinə Türkiyəli iş adamlarının cəlb olunması və investisiya qoyuluşu imkanları müzakirə edilib.
