9 yanvar 2026-cı il tarixində Azərbaycan Keyfiyyət Assosiasiyası, CFE Cert (Böyük Britaniya) və İNCERT beynəlxalq sertifikatlaşdırma təşkilatlarının birgə təşkilatçılığı ilə “Maliyyə sektoru üçün mühüm olan standartlar” mövzusunda seminar təşkil olunub.
Tədbirdə Azərbaycan Banklar Assosiasiyasına (ABA) üzv bankların nümayəndələri iştirak ediblər.
Seminar maliyyə sektorunda aktuallıq qazanan GRC (Governance, Risk and Compliance) yanaşması, həmçinin Azərbaycan Respublikasının Mərkəzi Bankının maliyyə qurumları üçün müəyyən etdiyi tələblər kontekstində beynəlxalq standartların tətbiqi məsələlərinə həsr olunub.
Tədbir çərçivəsində maliyyə sektoru üçün mühüm əhəmiyyət daşıyan ISO/IEC 27001, ISO/IEC 27701, ISO 22301, ISO/IEC 42001 və ISO 37301 beynəlxalq standartları üzrə təqdimatlar keçirilib. Təqdimatlar zamanı sözügedən standartların bank və digər maliyyə qurumlarında tətbiqi, eləcə də onların risklərin idarə olunması, məlumat təhlükəsizliyi, biznesin fasiləsizliyi və uyğunluq (compliance) sistemlərinin gücləndirilməsində rolu barədə ətraflı məlumat verilib.
