28 avqust 2025-ci il tarixində Mastercard və Filippinin aparıcı maliyyə qurumlarından biri olan RCBC maliyyə inklüzivliyi ilə bağlı yeni araşdırmanı açıqlayıb.
Tədqiqat göstərib ki, mobil telefon sahibliyinin yüksək olmasına baxmayaraq, Filippində yetkin əhalinin yalnız yarısının maliyyə hesabı var. Bu səbəbdən, rəqəmsal alətlərə çıxışın özlüyündə maliyyə inklüzivliyi yaratmadığı vurğulanıb.
Araşdırma RCBC-nin “DiskarTech” platforması əsasında aparılıb. “Taglish” və “Cebuano” dillərində interfeys təqdim edən tətbiqin nümunəsi göstərib ki, yerli dil imkanları, etimad yaradan funksiyalar və təhlükəsizlik yönümlü yanaşma maliyyə xidmətlərindən aktiv istifadənin əsas şərtləridir.
Məlumata əsasən, ilk 30 gündə sadə və şəffaf təcrübə təqdim olunması, tanış kommunikasiya kanallarının istifadəsi və 24/7 təhlükəsizlik tədbirlərinin vurğulanması müştərilərin davamlı iştirakını artırır.
RCBC prezidenti Reggie Cariaso bildirib ki, araşdırma maliyyə təşkilatları üçün mühüm vaxtda həyata keçirilib və texnologiya dəstəkli müştəri təcrübəsinin önəmini nümayiş etdirib.
Qeyd edək ki, Mastercard-ın təqdim etdiyi bu hesabat Asiya-Sakit okean regionunda ilk, qlobal miqyasda isə Braziliyada Nubank ilə aparılan tədqiqatdan sonra ikinci belə araşdırmadır.
