Bakı | BBN.az
Qlobal enerji bazarında kəskin dalğalanma müşahidə olunur. ABŞ prezidenti Donald Trump İranla müharibənin yaxın zamanda başa çata biləcəyinə dair açıqlama verdikdən sonra neft qiymətləri 10%-dən çox ucuzlaşıb.
Ticarət məlumatlarına görə, Brent markalı neftin may fyuçersləri 10,5% azalaraq bir barel üçün 88,61 dollar, ABŞ-ın WTI markalı xam nefti isə təxminən 10% ucuzlaşaraq 84,48 dollar səviyyəsinə düşüb.
Bazarlar bundan əvvəl də böyük dalğalanma yaşamışdı. Bazar ertəsi günü geosiyasi gərginliyin artması fonunda neftin qiyməti qısa müddət ərzində 119,5 dollar/barel səviyyəsinə qədər yüksəlsə də, sonradan sürətlə 90 dolların altına geriləyib.
Analitiklər bildirirlər ki, qiymətlərdəki enişə bir neçə amil təsir edib. Tramp İranla müharibənin yaxın zamanda başa çatacağını bəyan edib, eyni zamanda qlobal neft təchizatında yarana biləcək problemləri azaltmaq üçün bəzi enerji sanksiyalarının yumşaldılmasının mümkünlüyünü istisna etməyib.
Münaqişə fonunda diqqət mərkəzində olan əsas enerji marşrutlarından biri də Hörmüz boğazıdır. Qlobal neft tədarükünün təxminən 20 faizi məhz bu strateji boğaz vasitəsilə daşınır. İran isə müharibə fonunda bu marşrutun bağlana biləcəyi ilə bağlı bir neçə dəfə xəbərdarlıq edib.
Eyni zamanda ABŞ və G7 ölkələrinin mümkün neft çatışmazlığının qarşısını almaq üçün strateji neft ehtiyatlarının bazara buraxılması variantını müzakirə etdiyi bildirilir.
Ekspertlər qeyd edirlər ki, Yaxın Şərqdə gərginliyin davam etməsi enerji bazarında yüksək volatilliyin qalmasına səbəb ola bilər. Bununla belə, ilin əvvəlindən etibarən neft qiymətləri hələ də təxminən 25% artım nümayiş etdirir.