Trampın ultimatumu neft bazarlarını alovlandırdı: Hormuz boğazı açılmasa “cəhənnəm” vəd edilir
Dünya neft bazarları həftəyə kəskin artımla başlayıb. ABŞ Prezidenti Donald Trampın İranın strateji Hormuz boğazını açması üçün təyin etdiyi son müddət (ultimatum) neftin qiymətini son illərin rekord səviyyəsinə qaldırıb. “Açmasanız, hər şeyi partladacam!” Prezident Tramp özünün “Truth Social” hesabından İrana qarşı olduqca sərt və qeyri-etik ifadələrlə zəngin bir xəbərdarlıq yayıb. O bildirib ki, əgər Çərşənbə axşamı (sabah) saat 20:00-a qədər (ABŞ şərq vaxtı ilə) boğaz açılmasa, İranın bütün elektrik stansiyaları və körpüləri hədəf alınacaq. Tramp bu günü “Elektrik Stansiyası və Körpü Günü” adlandıraraq, İranın “cəhənnəmi yaşayacağını” qeyd edib.
Bu gərginlik fonunda neft qiymətləri sıçrayış edir:
Brent markalı neftin qiyməti 110,77 dollar səviyyəsinə yüksəlib.
WTI (ABŞ nefti) isə 113,62 dollara qədər bahalaşıb.
OPEC+ hərəkətə keçdi Bazardakı kəskin çatışmazlığı kompensasiya etmək üçün OPEC+ ölkələri (Səudiyyə Ərəbistanı, Rusiya, BƏƏ və digərləri) hasilatı may ayından etibarən sutkalıq 206 min barel artırmaq barədə razılığa gəliblər. Lakin ekspertlər hesab edir ki, dünya neft daşımalarının 20%-nin keçdiyi Hormuz boğazı qapalı qalsa, bu artım qiymətləri saxlamağa yetməyəcək. Bu arada gərginliyin hərbi qarşıdurmaya çevrilməməsi üçün Oman rəsmiləri Tehranla intensiv danışıqlar aparır. İrana boğazı açmaq müqabilində müharibə zərərinin ödənilməsi kimi şərtlər müzakirə olunur. Tramp isə nikbinliyini qoruyur: “Danışıqlar gedir, yaxın 24 saatda razılaşma şansı yüksəkdir. Amma razılaşma olmasa, nefti öz nəzarətimizə alacağıq.
