Yanvar-mart aylarında qeyri-neft ixracı 37% artıb

Azərbaycanın yanvar-mart aylarında qeyri-neft ixracı 37% artıb.

Belə ki, ölkənin ixrac potensialının yüksəlməsi, habelə əlverişli beynəlxalq iqtisadi konyunktur şəraitində xarici sektor göstəricilərinin 2017-ci ildən başlanan yaxşılaşması prosesi 2018-ci ilin ötən dövründə də davam edib.

Yanvar-mart aylarında xarici ticarət dövriyyəsi ötən ilin müvafiq dövrü ilə müqayisədə 31%,  qeyri-neft ixracı isə bu dövrdə 37% artıb. Ticarət balansı ilə yanaşı xidmətlər balansında da yaxşılaşma davam edir.

BBN.az Azərbaycan Respublikasının Mərkəzi Bankına istinadən xəbər verir ki, xarici ticarət balansının profisitliyi şəraitində ölkənin strateji valyuta ehtiyatları 2018-ci ilin I rübündə 2.2 mlrd. dollar məbləğində artıb.

Son proqnozlara görə mövcud şərtlər çərçivəsində 2018-ci ilin qalan dövründə də tədiyə balansı göstəricilərinin əlverişli olaraq qalacağı gözlənilir.

Xarici sektor göstəricilərinin pozitiv dinamikası şəraitində və qəbul olunmuş makroiqtisadi siyasət çərçivəsində manatın məzənnəsinin sabitliyi davam etmişdir.

Manatın məzənnəsinin sabit qalması inflyasiya səviyyəsinə və inflyasiya gözləntilərinə azaldıcı təsir göstərən mühüm amillərdən biri olub.

Qeyd edək ki, məzənnənin sabitliyi başlıca olaraq əhalinin əmanətləri üzrə dollarlaşmanın azalması proseslərinin sürətlənməsi ilə müşaiyət edilib.

© Materiallardan istifadə edərkən hiperlinklə istinad olunmalıdır