Beynəlxalq reytinq agentliyi Fitch Ratings 2026-cı ildə Azərbaycanın real ÜDM artımını 2,5% səviyyəsində proqnozlaşdırır. Bu barədə agentliyin “Sovereigns and Supranationals” bölməsinin direktoru Arvind Ramakrişnan məlumat verib.
Onun sözlərinə görə, artım əsasən qeyri-xammal sektorunun inkişafı və genişmiqyaslı dövlət investisiyaları hesabına təmin olunacaq. Neft hasilatında azalma davam etsə də, təbii qaz istehsalı dəstəkləyici rol oynayacaq.
Ramakrişnan qeyd edib ki, informasiya-kommunikasiya texnologiyaları və nəqliyyat sektorunda da yaxşı artım perspektivləri var. Son illərdə qeyri-xammal sektorunun genişlənməsi Qarabağda bərpa işləri hesabına sürətlənib.
Proqnozlara əsasən, 2026-cı ildə konsolidasiya olunmuş büdcədə ÜDM-in 0,3%-i həcmində profisit, 2027-ci ildə isə kiçik kəsir gözlənilir. Azərbaycan “BBB-” səviyyəsində sabit proqnozla investisiya reytinqini qoruyub saxlayır. Bu, ölkənin xarici balansının davamlılığı, dövlət borcunun aşağı səviyyəsi və Dövlət Neft Fondu (SOFAZ) ilə dövlət depozitlərinin əhəmiyyətli aktivləri hesabına dəstəklənir.
