Bazarlar ABŞ-da faiz dərəcələrinin gələcək trayektoriyasını qiymətləndirdiyi bir vaxtda qiymətli metallar ucuzlaşıb. Spot qızılın qiyməti Asiya sessiyasında 1,2% azalaraq 4 982 dollar/unsiya səviyyəsinə enib və psixoloji 5 000 dollar həddindən aşağı düşüb. Aprel fyuçersləri isə 0,9% geriləyərək 5 001 dollar olub.
Gümüş daha kəskin eniş göstərib – spot qiymət təxminən 3% azalaraq 75,45 dollar/unsiya səviyyəsinə düşüb. Platin də 1% ucuzlaşaraq 2 047 dollar olub.
Ticarət həcmləri aşağı olub, çünki Çin, Cənubi Koreya və ABŞ bazarları bağlı idi.
Qiymətli metallarda volatillik son həftələrdə artıb. Yanvarın sonundakı pik səviyyələrdən sonra qızıl və gümüş aşağı istiqamətdə hərəkət edir. ABŞ-da açıqlanan qarışıq inflyasiya göstəriciləri və faiz dərəcələri ilə bağlı qeyri-müəyyənlik investorların mövqeyinə təsir göstərir.
Xatırladaq ki, ABŞ Prezidenti Donald Trump may ayında səlahiyyət müddəti başa çatacaq Jerome Powell-ın yerinə Kevin Warsh-ı namizəd göstərib. Warsh daha sərt monetar siyasət tərəfdarı kimi qiymətləndirilir ki, bu da bazarlarda əlavə narahatlıq yaradıb.
Bu həftə investorların diqqəti Federal Reserve-in yanvar iclasının protokollarına və PCE inflyasiya göstəricilərinə yönələcək. Məlumatların faiz siyasətinin istiqamətinə dair daha aydın siqnallar verməsi gözlənilir.
Analitiklər bildirirlər ki, faizlərlə bağlı qeyri-müəyyənlik və qlobal geosiyasi risklər fonunda qızıl uzunmüddətli perspektivdə yenə də investorlar üçün cəlbedici aktiv olaraq qalır.
