ABŞ-ın əsas fond indeksləri — S&P 500, Nasdaq və Dow Jones — ardıcıl üçüncü ticarət gününü də enişlə tamamlayıb. İnvestorların diqqəti yaxın günlərdə açıqlanacaq şəxsi istehlak xərcləri (PCE) inflyasiya göstəricisinə yönəlib. Ekspertlər bildirirlər ki, bu göstəricinin nəticələri ABŞ Federal Ehtiyat Sisteminin (FED) faiz siyasətinə birbaşa təsir göstərəcək.
BBN.az xəbər verir ki,qlobal maliyyə bazarlarında artan volatilliyin əsas səbəbləri arasında likvidlik və faiz siyasəti ətrafında qeyri-müəyyənlik, geosiyasi risklərin davam etməsi və təhlükəsiz aktivlərə marağın yüksəlməsi göstərilir. Qızıl və dövlət istiqrazlarına tələbat artdığı halda, riskli aktivlərdə investorlar daha ehtiyatlı davranırlar.
Analitiklərin fikrincə, mövcud dinamika inkişaf etməkdə olan ölkələrin maliyyə sabitliyi üçün əlavə risklər yarada bilər. Kapital axınlarının istiqaməti və enerji qiymətlərində dəyişikliklər Azərbaycan da daxil olmaqla region ölkələrinin maliyyə sektoruna təsir göstərə biləcək əsas amillər sırasındadır.
