“Regional” MMC bank olmayan kredit təşkilatı (BOKT) 2025-ci ili 215 min manat xalis mənfəətlə başa vurub. Bu göstərici 2024-cü illə müqayisədə artım deməkdir – ötən il şirkətin xalis mənfəəti 192 min manat olub.
Maliyyə hesabatına əsasən, 2025-ci ildə BOKT-un vergiyəqədərki mənfəəti 269 min manat təşkil edib ki, bu da illik müqayisədə 40,1% çoxdur. Hesabat dövründə mənfəət vergisi üzrə ödənişlər 54 min manat olub, halbuki 2024-cü ildə şirkət vergi ödəməyib.
2026-cı il yanvarın 1-nə “Regional”ın aktivləri 6,588 milyon manata çatıb. Bu isə bir il əvvələ nisbətən 41,9% artım deməkdir. Aktivlərin əsas hissəsini – 4,834 milyon manatını müştərilərə verilmiş kreditlər təşkil edir. İl ərzində kredit portfeli 16,1% genişlənib.
Eyni dövrdə şirkətin öhdəlikləri 14% artaraq 4,709 milyon manata yüksəlib. Balans kapitalı isə 3,7 dəfə artaraq 1,879 milyon manata çatıb. Nizamnamə kapitalında da ciddi artım qeydə alınıb – bu göstərici 3,2 dəfə artaraq 1,6 milyon manat olub.
Xatırladaq ki, “Regional” BOKT 2014-cü ildə təsis edilib. Şirkətin təsisçiləri hər biri 33,3% payla Əli Əliyev, Nahid Bəhramov və Nigar Tağıyevadır.