2025-ci ildə Azərbaycanda qeyri-neft-qaz sektoru üzrə ümumi daxili məhsulun (ÜDM) dəyəri 92,3 milyard manat təşkil edib və bu göstərici ölkə üzrə ümumi ÜDM-in 71,5%-nə bərabər olub.
Bunu maliyyə naziri Sahil Babayev Milli Məclisin bugünkü plenar iclasında “2025-ci il dövlət büdcəsinin icrası haqqında” qanun layihəsinin müzakirəsi zamanı bildirib.
Nazirin sözlərinə görə, son illər həyata keçirilən ardıcıl islahatlar qeyri-neft sektorunun davamlı inkişafına şərait yaradıb. O qeyd edib ki, 2025-ci ildə qeyri-neft-qaz sektoru 2024-cü illə müqayisədə real ifadədə 2,7% artım nümayiş etdirib.
S.Babayev bildirib ki, 2025-ci ildə icmal büdcədə qeyri-neft-qaz gəlirlərinin payı 55,2%-ə, qeyri-neft-qaz vergilərinin payı isə 25%-ə yüksəlib. Bu göstəricilər əvvəlki illə müqayisədə müvafiq olaraq 2,8 faiz bəndi və 2 faiz bəndi artıb.
Onun sözlərinə görə, dövlət büdcəsinin qeyri-neft-qaz gəlirlərinin ümumi daxilolmalardakı xüsusi çəkisi son beş ildə 43,3%-dən 52%-ə yüksəlib. 2026-cı ilin dövlət büdcəsində isə bu göstəricinin 57,4%-ə çatdırılması nəzərdə tutulur.
Nazir əlavə edib ki, hesabat dövründə cari xərclərin qeyri-neft-qaz gəlirləri hesabına ödənilməsi səviyyəsi 92% təşkil edib. Bu, proqnoz göstəricisindən 7,5 faiz bəndi, 2024-cü ilin nəticəsindən isə 0,2 faiz bəndi yüksəkdir.
Sahil Babayev vurğulayıb ki, ortamüddətli dövrün sonuna, yəni 2029-cu ilədək cari xərclərin qeyri-neft-qaz gəlirləri hesabına tam, yəni 100% səviyyəsində qarşılanması hədəflənir.
Nazirin sözlərinə görə, bu göstəricilərin dinamikası dövlət büdcəsinin neft gəlirlərindən asılılığının azaldılması və qeyri-neft-qaz sektorunun inkişafının dövlət siyasətinin əsas prioritetlərindən biri olduğunu göstərir. O qeyd edib ki, qeyri-neft-qaz gəlirlərinin artırılması və gəlir mənbələrinin şaxələndirilməsi istiqamətində tədbirlər bundan sonra da davam etdiriləcək.