Ermənistan hakimiyyəti yeni Konstitusiya layihəsi üzərində işləyir. Sənədin mart ayına qədər hazırlanması, referendumun isə iyun ayında keçiriləcək parlament seçkilərindən sonra təşkili planlaşdırılır.
Bu barədə S&P Global Ratings beynəlxalq reytinq agentliyinin Ermənistan üzrə qiymətləndirməsində bildirilib.
Qiymətləndirmədə qeyd olunur ki, Konstitusiya islahatı Azərbaycanla aparılan sülh danışıqları kontekstində xüsusi əhəmiyyət daşıyır. Xüsusilə sənədin preambulasında 1990-cı il Müstəqillik Bəyannaməsinə istinadların saxlanılıb-saxlanılmayacağı əsas mübahisə mövzularından biridir. Azərbaycan həmin istinadları potensial ərazi iddiaları kimi qiymətləndirir.
Agentliyin rəyinə görə, Ermənistan və Azərbaycan arasında danışıqlarda mümkün irəliləyiş yaxın müddətdə təhlükəsizlik risklərini azalda bilər. Bununla belə, yekun və hüquqi baxımdan məcburi sülh sazişinin imzalanması və effektiv icrası zaman tələb edəcək.
Hesabatda vurğulanır ki, iyuna planlaşdırılan parlament seçkiləri siyasi sabitlik və siyasət kursunun davamlılığı baxımından mühüm sınaq olacaq. Son rəy sorğularına əsasən, Baş nazir Nikol Paşinyan və onun rəhbərlik etdiyi Vətəndaş Müqaviləsi Partiyası hələ də öncül mövqedədir. Lakin 2021-ci ilin növbədənkənar seçkilərindən sonra dəstək səviyyəsinin azaldığı qeyd olunur. Müxalifətin isə parçalanmış vəziyyətdə olduğu və vahid lider ətrafında birləşə bilmədiyi bildirilir.
Əsas ssenariyə görə, iyun seçkilərindən sonra siyasi kursda ümumi davamlılıq gözlənilir və yeni hökumətin Azərbaycanla tam sülh sazişinə nail olmağa yönəlmiş siyasəti davam etdirəcəyi ehtimal edilir.
Qiymətləndirmədə həmçinin qeyd olunur ki, xərclər prioritetləri yenidən balanslaşdırılır. Orta müddətli iqtisadi artımı dəstəkləmək üçün kapital qoyuluşlarının yüksək səviyyədə saxlanılması, müdafiə xərclərinin isə həm nominal ifadədə, həm də ÜDM-də pay baxımından azaldılması planlaşdırılır. Bu yanaşma Azərbaycanla aparılan sülh danışıqları fonunda yaxın müddətdə təhlükəsizlik risklərinin azalacağı gözləntiləri ilə əlaqələndirilir.
