2025-ci ilin ilk altı ayı ərzində dünyada baş verən təbii fəlakətlər nəticəsində ümumi iqtisadi zərər 162 milyard ABŞ dolları təşkil edib.
Məlumata əsasən, bu məbləğin 100 milyard dolları sığorta şirkətləri tərəfindən ödənilib. Bu göstərici birinci yarımil üçün tarixdə qeydə alınan ikinci ən yüksək rəqəmdir.
İtkilərin əsas hissəsi ABŞ ərazisində qeydə alınıb. Təkcə bu ölkədə iqtisadi zərər 126 milyard dollara çatıb ki, bu da indiyədək ABŞ üçün ən yüksək yarımillik göstəricidir.
Sığortalanmış zərərlərin 90 faizdən çoxu ABŞ-da baş verən hadisələrlə bağlıdır. Bununla yanaşı, qlobal miqyasda qorunmamış (sığortasız) itkilərin payı 38 faiz olub. Bu, 21-ci əsr üzrə ən aşağı səviyyə hesab edilir.
Qeyd olunur ki, başlıca təbii fəlakətlər sırasında Los-Ancelesdə baş verən Palisades yanğını, ABŞ-da müşahidə olunan güclü fırtınalar, Avstraliyada daşqınlar, İsveçrədə isə buzlaq çökməsi olub.
Sığorta sektorunun rolunun təkcə zərərləri qarşılamaqdan ibarət olmadığı vurğulanır. Mütəxəssislər bildirirlər ki, sektor həm də risklərin idarə olunması, azaldılması və qabaqlanması istiqamətində daha fəal iştirak etməlidir.
Hesabatda, xüsusilə inkişaf etməkdə olan ölkələrdə – Asiya, Afrika və Latın Amerikasında – sığorta sistemlərinin zəif olduğu və bunun dayanıqlığa təsir etdiyi qeyd edilib.