ABŞ Prezidenti Donald Tramp bu gün TikTok-un ölkədəki əməliyyatlarının satışına dair danışıqların 2024-cü il qanununun tələblərinə cavab verdiyini təsdiqləyən sərəncam imzalayacaq.
BBN.az xəbər verir ki, imzalanacaq fərman TikTok-un ABŞ-dakı aktivlərinin satış müddətini uzadacaq.
Ağ Evdəki mənbələrin məlumatına görə, bu addım platformanın ABŞ aktivlərini qlobal şəbəkədən ayırmaq, amerikalı investorlar tapmaq və yeni mülkiyyət modelini qanuna əsasən tam icra olunmuş hesab etmək məqsədi daşıyır.
Xatırladaq ki, Tramp daha əvvəl qanunun icrasını dekabrın ortalarınadək təxirə salmışdı. O, həmçinin TikTok-un 170 milyon ABŞ istifadəçisinə sahib olduğunu və yenidən seçilməsində mühüm rol oynadığını, şəxsi hesabındakı izləyici sayının isə 15 milyona çatdığını vurğulamışdı.
Qeyd edək ki, Ağ Ev də ötən ay rəsmi “TikTok” hesabı açıb.
