Dünyanın ən böyük onlayn taksi xidmətlərindən olan “Uber” 2020-ci ilin birinci rübü üzrə maliyyə göstəricilərini açıqlayıb. Göstəricilərdə, şirkətin birinci rübdə 2.9 milyard dollar həcmində zərərə uğraması əks olunub. Şirkət gəlirlərində 14%-lik artım açıqlasa da, pandemiya dövründə əməliyyat xərclərində müşahidə edilən artım mənfəətin qarşısını alıb. Şirkətin müştəri bazası isə ötən ilin müvafiq dövrü ilə müqayisədə 11% çoxdur.
Şirkət maliyyə göstəricilərini açıqladıqdan dərhal sonra səhmlərində 3%-lik geriləmə müşahidə olunsa da, qısa bir müddət sonra 9%-lik artım qeydə alınıb. Hazırda “Uber” səhminin birja qiyməti 31 dollar civarındadır.
Şirkətin bazarda əsas rəqibi olan “Lyft” şirkəti də gəlirlərində illik 23%-lik artım qeydə alsa da, xalis zərər göstəricisi 400 milyon dollar civarında qərarlaşıb.
