Venesuelada baş verən son siyasi hadisələr fonunda bazar ertəsi günü keçirilən ticarətlərdə ABŞ-ın aparıcı neft şirkətlərinin səhmlərində əhəmiyyətli artım qeydə alınıb.
ABŞ prezidenti Donald Trampın açıqlamasına görə, Venesuela prezidenti Nikolas Maduronun oğurlanmasından sonra ölkədə faktiki idarəetmə ABŞ-ın nəzarətinə keçib. Bu bəyanat bazarlarda risk gözləntilərini artıraraq enerji sektorunda müsbət dinamika yaradıb.
Chevron Corp. şirkətinin səhmləri Bakı vaxtı ilə saat 13:00-da ticarətlərin açılışında 13% bahalaşaraq 170 ABŞ dolları səviyyəsini keçib. Qeyd edək ki, səhmlər 2 yanvar tarixində 155,8 dollarla bağlanmışdı. Gün ərzində qiymət 165 dollara qədər geri çəkilsə də, saat 15:30-da 167 dollar səviyyəsində korreksiya olunub.
ExxonMobil Corp. səhmləri də ticarətlərin əvvəlindən artım nümayiş etdirərək saat 15:30-da 127 ABŞ dollarına çatıb ki, bu da əvvəlki bağlanışla müqayisədə 4%-lik artım deməkdir. ConocoPhillips şirkətinin səhmləri isə təxminən 8% bahalaşaraq 104 dollar səviyyəsinə yüksəlib.
Bazar ertəsi günü ticarətlərində qiymətli metallar bazarında da yüksəliş müşahidə olunub. Qızılın spot qiyməti bir troya unsiyası üçün 4438 ABŞ dollarına qədər qalxıb. Saat 15:30-da isə metal 4422 dollardan ticarət olunub ki, bu da bağlanış qiymətinə nisbətən 2% artım deməkdir. COMEX birjasında fevral fyuçersləri isə 2%-dən çox bahalaşaraq 4433 dollara çatıb.
Gümüşün spot bazardakı qiyməti 76 ABŞ dollarını keçib. Gün ərzində qısa müddətli korreksiya nəticəsində qiymət 75 dolların altına düşsə də, sonradan yenidən artaraq 4,5% yüksəliş qeydə alıb.
Platinanın spot qiyməti bir unsiya üçün 2232,35 ABŞ dollarına (+5,4%) yüksəlib. Korreksiyadan sonra qiymət saat 15:30-da 2177 dollar səviyyəsində formalaşıb. Palladium isə spot bazarda təxminən 1700 ABŞ dollarından ticarət olunub ki, bu da 2%-lik artıma bərabərdir.
