Dünyanın ən böyük silikon çip istehsalçısı olan “Taiwan Semiconductor Manufacturing Co” (TSMC) Yaponiyada ilk böyük çip zavodunu inşa edəcəyini açıqlayıb. Gələn il inşasına başlanması planlaşdırılan zavodun 2024-cü ilədək yekunlaşacağı proqnozlaşdırılıb. Zavod 22 və 28 nanometr ölçülü çip texnologiyasının istehsalına fokuslanacaq.
Şirkət rəsmisi mətbuata açıqlamasında, həm müştərilərindən, həm də Yaponiya hökumətindən bu barədə təsdiq cavabı alındığını bildirib.
“TSMC” həmçinin bildirib ki, zavod üçün ilkin 7 milyard dollarlıq investisiya qoyulsa da, şirkətin Yaponiyada uzunmüddətli dövr üçün 100 milyar dollar həcmində investisiya layihələri planları mövcuddur.
Məlumat üçün qeyd edək ki, Yaponiyanın texnologiya nəhəngi “Sony Corporation” da bu zavodun tikintisində Tayvan şirkətinə dəstək göstərəcək.
