Dünya bazarlarında neft qiymətləri Yaxın Şərqdə gərginliyin artması və Saudi Aramco şirkətinin neft emalı zavoduna zərbə endirilməsi barədə xəbərlər fonunda kəskin yüksəlib.
Yazın ilk ticarət sessiyalarında qiymətlər 10 %-ə yaxın artım göstərib.
Brent markalı neftin may fyuçersləri bir barel üçün 80,05 ABŞ dollarına çatıb. WTI markalı neftin aprel fyuçersləri isə 9,06 % bahalaşaraq 73,09 ABŞ dolları olub.
Bundan əvvəl, Bakı vaxtı ilə saat 03:02-yə olan məlumata əsasən, ICE birjasında Brent markalı xam neftin qiyməti ticarət həftəsinin əvvəlində 12,2 % artaraq 23 iyun 2025-ci ildən bəri ilk dəfə olaraq bir barel üçün 81 dollar həddini keçib və 81,79 dollara yüksəlib.
Saat 03:16-ya olan məlumata görə isə artım tempi bir qədər zəifləyib və Brent nefti 9,02 % bahalaşma ilə 79,4 dollar səviyyəsində ticarət olunub.
Analitiklər qeyd edirlər ki, regionda hərbi risklərin artması enerji bazarlarında qiymət dalğalanmalarını gücləndirir və investorlar mümkün təchizat risklərini qiymətlərə daxil edirlər.
