2022-ci ildə iqtisadi və siyasi səbəblərdən dolayı Avropa İttifaqına mühacirlik ilə bağlı müraciət edənlərin sayı 1 milyon nəfərə yaxınlaşıb. Verilən məlumata əsasən onların sırasında isə əfqan və suriyalılar üstünlük təşkil edir.
BBN.az DW Business-ə istinadən xəbər verir ki, çərşənbə günü Mühacirlər üçün Avropa İttfaqı Agentliyindən verilən məlumatda deyilib ki, bu isə 2016-cı ildən bu yana ən yüksək rəqəm hesab edilir.
“Agentlik 2022-ci ildə 966.000 müraciət əldə edib ki, bu da 2021-ci ildən 50% daha çoxdur”, – deyə açıqlamada bildirilib. Rəqəmlərə Aİ ölkələri və ona daxil olmayan Norveç və İsveçrə üçün müraciətlər də daxildir.
Qeyd edək ki, Ukrayna vətəndaşları üçün isə Aİ-nin başqa bir mexanizmi işləyir və onların müraciətləri bura daxil deyil. Məqsəd isə Ukrayna vətəndaşlarının müraciətlərinə daha tez baxılması ilə bağlıdır. Bildirək ki, 2016-cı ildə Suriya konfliktindən dolayı təxminən 1.251.815 nəfər mühacirlik ilə bağlı Aİ-yə müraciət etmişdi. Bu isə İkinci Dünya Müharibəsindən bu yana Avropaya ən böyük axın idi.
