Tədarük zəncirindəki fasilələr və ABŞ-İran gərginliyinin davam etməsi fonunda dünya bazarında xam neft qiymətləri yüksəlişini davam etdirir.
Dünya bazarında xam neft qiymətləri növbəti artım dalğası ilə son iki həftənin ən yüksək səviyyəsinə yaxınlaşıb. Qiymətlərin bahalaşmasına əsas səbəb ABŞ və İran arasında Hörmüz boğazının yenidən açılması ilə bağlı razılığın əldə olunmaması və Qırmızı dənizdə gəmiçiliyə yönələn yeni hücumlar göstərilir.
Qiymətlərdə son dinamika
Brent markalı neft: Nyu-York birjasında Brent neftinin fyuçersləri 0,7% bahalaşaraq bir barel üçün 89,55 dollar təşkil edib.
WTI markalı neft: ABŞ-nin “West Texas Intermediate” (WTI) markalı xam neft fyuçersləri 0,8% artaraq bir barel üçün 83,89 dollar səviyyəsinə yüksəlib.
Hörmüz boğazında böhran davam edir
Dünya neft tədarükünün təxminən 20%-nin keçdiyi strateji Hörmüz boğazında gəmilərin hərəkəti məhdud səviyyədə qalmaqdadır. Vaşinqton və Tehran arasında danışıqlarda irəliləyişin olmaması bazarlarda narahatlığı artırır.
Tehran rəhbərliyi zərərin ödənilməsi tələbləri qəbul edilmədiyi təqdirdə boğazın bağlı qalacağını bildirib. ABŞ tərəfi isə bu tələblərə kəskin etiraz edir. Birləşmiş Ştatların Oman körfəzində İrana tərəf hərəkət etdiyi iddia olunan gəmiyə zərbə endirməsi tərəflər arasında gərginliyi daha da dərinləşdirib.
Qırmızı dənizdə husi təhlükəsi
Tədarük risklərini artıran digər mühüm amil Yəməndəki İran yönümlü husilərin Qırmızı dəniz və Bab əl-Məndəb boğazında gəmilərə hücumlarını davam etdirməsidir. Qruplaşmanın Səudiyyə Ərəbistanına qarşı dəniz blokadası elan etməsindən sonra bölgədə eskalasiya yenidən kəskinləşib.
Analitiklərin fikrincə, Yaxın Şərqdə münaqişənin səngiməməsi və tədarük zəncirindəki kəsintilərin uzunmüddətli xarakter alması investorları həyəcanda saxlayır ki, bu da yaxın dövrdə neft qiymətlərinə dəstək verməkdə davam edəcək.
