Azərbaycan Banklar Assosiasiyası (ABA) 10 avqust 2026-cı il tarixindən etibarən Asiya Maliyyə Əməkdaşlığı Assosiasiyasının (Asian Financial Cooperation Association – AFCA) rəsmi üzvü olub.
ABA-nın AFCA-ya üzvlüyü 10 avqust 2026-cı il tarixində keçirilmiş AFCA İcraiyyə Şurasının 3-cü Konfransında təsdiqlənib. Bununla da Azərbaycan Banklar Assosiasiyası AFCA ailəsinə qoşularaq Asiya və digər regionların maliyyə sektorunu təmsil edən qurumlarla əməkdaşlıq imkanlarını genişləndirib.
2017-ci ildə təsis edilmiş Asiya Maliyyə Əməkdaşlığı Assosiasiyası (AFCA) maliyyə sektorunun müxtəlif iştirakçıları arasında əməkdaşlıq və təcrübə mübadiləsini təşviq edən beynəlxalq platformadır. AFCA-nın rəsmi məlumatına əsasən, təşkilat 31 ölkə və regiondan 120-dən çox üzvü birləşdirir və maliyyə sektorunda regional əməkdaşlığın və əlaqələrin inkişafına xidmət edir.
ABA-nın AFCA-ya üzvlüyü Azərbaycan bank sektorunun beynəlxalq əməkdaşlıq imkanlarının genişləndirilməsi, regional maliyyə qurumları ilə əlaqələrin inkişaf etdirilməsi və qabaqcıl beynəlxalq təcrübələrin ölkəmizdə tətbiqi baxımından mühüm əhəmiyyət daşıyır.
Üzvlük çərçivəsində ABA-nın AFCA-nın tədbirlərində, işçi platformalarında və digər əməkdaşlıq təşəbbüslərində fəal iştirakı, həmçinin Azərbaycan bank sektorunun regional və beynəlxalq səviyyədə daha geniş şəkildə təmsil olunması nəzərdə tutulur.
