“Tesla” gözləniləndən artıq avtomobil istehsal edib

Amerikan elektrikli avtomobil istehsalçısı “Tesla” Çində və ABŞ-da yerləşən zavodlarını koronavirus pandemiyası səbəbindən bağlamağa məcbur qalsa da, 2020-ci ilin birinci rübü üzrə açıqladığı göstəricilərdə 100 mindən çox elektrikli avtomobil istehsal etdiyini göstərib. Şirkət istehsal etdiyi 102 min 672 avtomobilin 88 min 400-ünü satışa çıxarıb. “Wall Street” təxminləri isə “Tesla”nın maksimal istehsal həcminin 80 mini keçməyəcəyi yönündə idi.

Hesabatda, “Tesla”nın birinci rüb satışlarının ötən rübün rekord satış həcminə nisbətdə 21% geriləməsi müşahidə olunsa da, ötən ilin birinci rüb göstəricisinə nisbətdə 40%-lik artışa nail olunub.

Bu artımlar səhm qiymətlərinə də təsirsiz ötüşməyib. Belə ki, 2020-ci ilin ilk rübü ərzində ümumilikdə 17%-lik artım nəticəsində “Tesla” şirkətinin səhm dəyəri 455 dollar civarında qərarlaşıb.

Məlumat üçün qeyd edək ki, koronavirus səbəbindən Amerika, Asiya və Avropa qitələrində fəaliyyət göstərən əksər avtomobil istehsalçılarının satışlarında birinci rübdə kəskin azalmalar müşahidə olunub.