ABŞ Prezidenti Donald Tramp Çin tərəfindən nadir torpaq elementlərinin ixracına qoyulan məhdudiyyətlərə cavab olaraq Çin məhsullarına qarşı 100 faiz əlavə gömrük vergisi tətbiq ediləcəyini açıqlayıb.
BBN.az xəbər verir ki, Tramp Çinin 1 noyabrdan etibarən demək olar ki, bütün istehsal etdiyi məhsullara — hətta bəziləri öz istehsalı olmayan mallara belə — genişmiqyaslı ixrac nəzarəti tətbiq etməyi planlaşdırdığını bildirib. O, bu addımı “son dərəcə düşməncəsinə yanaşma” və “beynəlxalq ticarətdə misli görünməmiş hadisə” kimi dəyərləndirib.
Tramp qeyd edib ki, bu qərar bütün ölkələrə təsir edəcək və illər əvvəl hazırlanmış strateji planın bir hissəsidir:
“Beynəlxalq ticarətdə bu, tamamilə misli görünməmiş bir hadisədir və digər ölkələrlə münasibətlər baxımından mənəvi bir utancdır.”
ABŞ lideri “Truth Social” platformasında paylaşdığı açıqlamada əlavə edib ki,“1 noyabr 2025-ci ildən etibarən (və ya Çinin atacağı hər hansı addımdan və ya dəyişiklikdən asılı olaraq daha erkən) Amerika Birləşmiş Ştatları hazırda Çinə tətbiq edilən tariflərə əlavə olaraq 100 faiz tarif tətbiq edəcək. Bundan əlavə, həmin tarixdə bütün kritik proqram təminatlarına ixrac nəzarəti də qüvvəyə minəcək.”
Bu addım Vaşinqton və Pekin arasında artan ticarət gərginliyinin yeni mərhələsini ifadə edir. Analitiklərin fikrincə, ABŞ-ın qərarı qlobal texnologiya və enerji bazarlarında zəncirvari reaksiyalara, xüsusilə də nadir torpaq elementləri və strateji xammal təchizatı sahəsində qiymət dalğalanmalarına səbəb ola bilər.
