Açıq bankçılıq bazarının həcmi 37 milyard dolları ötəcək – PROQNOZ

Bütün növ maliyyə texnologiyaları üzrə fəaliyyət göstərən şirkətləri özündə cəmləşdirən “fintech” konsepsiyası artıq uzun müddətdir ki, bankçılıq sahəsində payını artırmaqdadır. “Fintech” konsepsiyasının bankçılıq sektoru üzrə ən böyük təcəssümlərindən biri də açıq bankçılıq (open banking) trendidir.

“ResearchAndMarkets” analitika platforması tərəfindən aparılan araşdırmaları nəticəsində tərtib edilən “Open Banking Global Market Report 2021: COVID-19 Implications and Growth” hesabatına əsasən, 2020-ci ildə 11.79 milyard dollar həcmində dəyərləndirilən açıq bankçılıq seqmenti 2021-ci ildə 15.13 milyard dolları ötüb. 28.4% artıma nail olan bu bazarda fəaliyyət göstərən əsas maliyyə qurumları “Capital One”, “HSBC Bank plc”, “Banco Bilbao Vizcaya Argentaria S.A”, “NatWest Group plc”, “DBS Bank”, “Barclays”, “Lloyds Banking Group”, “Citigroup”, “Banco Santander S.A.”, “Credit Agricole”, “NCR Corporation”, “DemystData”, “Figo GmbH”, “Finastra”, “Jack Henry & Associates Inc.”, və “MineralTree” olub.

Bununla yanaşı, açıq bankçılığın gələcək perspektivləri də hesabatda yer alıb. Göstəricilərə əsasən, 2025-ci ilədək açıq bankçılıq bazarının ümumi həcminin 37.77 milyard dollar səviyyəsinə çatması proqnozlaşdırılıb. Hesabat üçün araşdırmalar aparılan başlıca ölkələr Avstraliya, Braziliya, Çin, Fransa, Almaniya, Hindistan, İndoneziya, Yaponiya, Rusiya, Cənubi Koreyaa, Birləşmiş Krallıq və ABŞ olub.