Aİ ABŞ-dan ticarət müqaviləsinə əməl etməsini tələb edir.
BBN.az xəbər verir ki, Avropa İttifaqı (Aİ) Komissiyası ABŞ Ali Məhkəməsinin tariflərlə bağlı qərarından və ardınca ABŞ Prezidenti Donald Trampın ABŞ-ın digər ölkələrdən idxal etdiyi məhsullara əvvəlcə 10 faiz, daha sonra isə 15 faiz həcmində qlobal tarif tətbiq edəcəyini açıqlamasından sonra bəyanat yayıb.
Bəyanatda qeyd olunub ki, Aİ ABŞ-dan Beynəlxalq Fövqəladə İqtisadi Səlahiyyətlər Qanunu ilə bağlı Ali Məhkəmənin son qərarından sonra atmağı planlaşdırdığı addımlar barədə tam aydınlıq tələb edir. Bildirilib ki, mövcud vəziyyət hər iki tərəfin razılaşdığı və Aİ-ABŞ Birgə Bəyanatında əksini tapmış “ədalətli, balanslı və qarşılıqlı fayda verən” transatlantik ticarət və investisiya münasibətlərinin təmin olunmasına uyğun deyil.
Açıqlamada Aİ şirkətləri və ixracatçılarının ədalətli rəftar, proqnozlaşdırıla bilənlik və hüquqi təminatlara malik olmasının əhəmiyyəti vurğulanaraq bildirilib: “Razılaşma razılaşmadır. ABŞ-ın ən böyük ticarət tərəfdaşı olan Aİ öz öhdəliklərinə sadiq qaldığı kimi, ABŞ-dan da birgə bəyanatda göstərilən öhdəlikləri yerinə yetirməsini gözləyir.”
