Azərbaycan Mərkəzi Bankı yerli bankların kənd təsərrüfatı sahəsində risklərinin qiymətləndirilməsi üçün yeni alətlər üzərində işləyir.
Bu barədə AMB-nin sədri Taleh Kazımov bu gün keçirilən mətbuat konfransında məlumat verib.
Onun sözlərinə görə, kənd təsərrüfatının kreditləşdirilməsi istiqamətində Aqrar Kredit və İnkişaf Agentliyi tərəfindən fəal iş aparılır.
T.Kazımov bildirib ki, həm texnoloji həllərin tətbiqi, həm də bankların riskləri daha dəqiq qiymətləndirə bilməsi üçün yeni mexanizmlər hazırlanır.
“Bildiyim qədər həm subsidiyalar, həm də kreditləşmə ilə bağlı müzakirələr aktiv şəkildə davam edir. Kənd təsərrüfatının ölkəmiz üçün prioritet sektor olduğunu bilirik və bu sahədə maliyyə resurslarına çıxışın təmin olunması əsas prioritetlərdən biridir”, – deyə AMB sədri qeyd edib.
O əlavə edib ki, həyata keçirilən tədbirlərin yaxın gələcəkdə müsbət nəticə verəcəyi gözlənilir.
