Bu ilin yanvar-iyul aylarında Azərbaycanda məcburi dövlət sosial sığorta haqları üzrə daxilolmalar 4 milyard 37,3 milyon manat təşkil edib. Hesabat dövründə proqnozdan əlavə 229,4 milyon manat vəsait daxil olub.
Bu barədə İqtisadiyyat Nazirliyi yanında Dövlət Vergi Xidməti məlumat yayıb.
Məlumata görə, ilk 7 ay ərzində qeyri-büdcə təşkilatları üzrə məcburi dövlət sosial sığorta daxilolmaları 2 milyard 687,2 milyon manatdan çox olub.
Eyni zamanda, işsizlikdən sığorta haqları üzrə daxilolmalar 143,5 milyon manat təşkil edib ki, bu da proqnozdan 6,8 milyon manat çoxdur. Bu istiqamətdə qeyri-büdcə təşkilatları üzrə daxilolmalar 110,2 milyon manata yaxın olub.
Hesabat dövründə icbari tibbi sığorta haqları üzrə daxilolmalar isə 606,8 milyon manatı ötüb. Bu göstərici proqnozu 15,6 milyon manat üstələyib. Qeyri-büdcə təşkilatları üzrə icbari tibbi sığorta daxilolmaları isə 402,4 milyon manatdan çox olub.