“Effektiv idarəetmə və makroiqtisadi göstəricilər işçi qrupu”nun növbəti iclası keçirilib

Cari ilin 10 sentyabr tarixində Biznes mühiti və beynəlxalq reytinqlər üzrə Komissiyanın “Effektiv idarəetmə və makroiqtisadi göstəricilər işçi qrupu”nun növbəti iclası keçirilib.

“Webex” platforması üzərindən keçirilən iclasda Azərbaycan Respublikası Mərkəzi Bankının, Maliyyə Nazirliyinin, İqtisadiyyat Nazirliyinin, Dövlət Neft Fondunun, Dövlət Statistika Komitəsinin, Ekologiya və Təbii Sərvətlər Nazirliyinin, Energetika Nazirliyinin məsul şəxsləri iştirak edib. İclasda işçi qrupunun cari ildə fəaliyyət planının 1-ci yarımilliyi üzrə görülmüş işlər müzakirə edilib və qarşıda duran məsələlər ətrafında fikir mübadiləsi aparılıb.

Büdcə şəffaflığının təmin edilməsi, borc dayanıqlılığının artırılması, dövlət tənzimlənməsi yükü, borc dinamikası, monetar azadlıq, Qlobal İnnovasiyalar İndeksi, həmçinin təbii resursların effektiv idarə edilməsi ilə bağlı məsələlər iclasın əsas müzakirə mövzusu olub.

Qarşılıqlı müzakirə formatında aparılan iclasın nəticəsində ölkəmizin beynəlxalq reytinqlərdə mövqeyinin yüksəldilməsi istiqamətində fəaliyyətlərin icra edilməsi, dövlət tənzimlənməsi yükünün optimallaşdırılması və təbii resursların effektiv idarə edilməsi barədə tədbirlərin icra edilməsi çərçivəsində növbəti yarımillik ərzində işlərin daha da effektiv idarə edilməsi qərarı alınıb.

İclasda həyata keçirilən tədbirlərin effektivliyi qiymətləndirilib və qarşıdakı dövrdə atılacaq addımlar müəyyən olunub. İşçi qrupunun üzvləri ölkəmizin dayanıqlı iqtisadi inkişafını təmin etmək üçün fəal müzakirələr aparıb və gələcək planlar üzrə birgə razılıq əldə edib.