Azərbaycan Mərkəzi Bankının (AMB) İdarə Heyəti bank olmayan kredit təşkilatlarında (BOKT) kənar auditin aparılmasına dair minimum tələbləri təsdiqləyib.
BBN.az xəbər verir ki, bu barədə qərarı AMB-nin sədri Taleh Kazımov imzalayıb.
Yeni tələblərə əsasən, qaydalar yalnız qanunvericiliklə nəzərdə tutulmuş kənar auditlərə şamil olunur və BOKT-ların öz təşəbbüsü ilə keçirilən auditlər bu kateqoriyaya daxil deyil.
Qərara görə, kənar auditor:
-
Auditorlar Palatasının ictimai əhəmiyyətli qurumlar üçün müəyyən etdiyi tələblərə cavab verməlidir;
-
Müstəqil olmalı və BOKT-la hər hansı işgüzar və ya digər əlaqəsi olmamalıdır;
-
Yoxlamada iştirak edəcək əməkdaşlar son 3 ildə həmin BOKT-də işləməməlidir;
-
Eyni auditor eyni BOKT-un auditini ardıcıl 5 ildən artıq aparmamalıdır.
BOKT-lar hər il dekabrın 15-nə qədər audit yoxlamasını aparacaq kənar auditor barədə AMB-yə yazılı məlumat təqdim etməlidir.
Qərarın 3 gün müddətində Hüquqi Aktların Dövlət Reyestrinə daxil edilməsi üçün AMB-nin Hüquq departamentinə müvafiq tapşırıq verilib.
