Dünya Bankı 2026-cı ildə qlobal əmtəə qiymətlərinin son altı ilin ən aşağı səviyyəsinə düşəcəyini proqnozlaşdırır. Bankın açıqladığı “Commodity Markets Outlook” hesabatına əsasən, zəif qlobal iqtisadi artım, neft bazarında artan təklif və qeyri-müəyyən siyasət mühiti qiymətlərə təzyiq göstərir.
Hesabatda bildirilir ki, əmtəə bazarındakı enişə əsasən enerji qiymətləri səbəb olur. Brent markalı neftin orta qiymətinin 2025-ci ildə 68 dollar/bareldən 2026-cı ildə 60 dollar/barelə enəcəyi gözlənilir. Bu, son beş ilin ən aşağı göstəricisidir. Dünya Bankına görə, zəif tələbat və elektrik nəqliyyatına keçidin sürətlənməsi neft bazarında profisiti artırır.
Aşağı enerji qiymətləri qlobal inflyasiyanın zəifləməsinə kömək etsə də, analitiklər bildirirlər ki, uzunmüddətli profisit enerji sektorunda investisiyaların azalmasına səbəb ola bilər.
Qida məhsulları bazarında da məhdud eniş müşahidə olunur. Buğda, düyü və soya qiymətlərinin ucuzlaşması fonunda gübrə qiymətlərinin 2025-ci ildə 21% artacağı, yalnız 2026-cı ildə qismən azalacağı proqnozlaşdırılır.
Əksər əmtəələr ucuzlaşsa da, qiymətli metallar artım trendini qoruyur. Dünya Bankının məlumatına görə, qızıl 2025-ci ildə kəskin bahalaşıb və 2026-cı ildə də təhlükəsiz aktivlərə tələbat fonunda yüksəliş davam edə bilər.
Bank bildirir ki, qlobal əmtəə qiymətləri 2025 və 2026-cı illərdə hər il orta hesabla 7% azalacaq. Bununla belə, qiymətlər hələ də pandemiyadan əvvəlki səviyyələrlə müqayisədə yüksək olaraq qalır.
Dünya Bankı xəbərdarlıq edir ki, geosiyasi gərginliklər, ticarət məhdudiyyətləri və hava şəraiti ilə bağlı risklər bazarlarda yeni dalğalanmalara səbəb ola bilər.
