Son dövrlərdə banklara qarşı kiberhücumların artması fonunda maliyyə sabitliyi üçün institusional boşluqlar yaranıb və bu boşluqlar bir sıra istiqamətlərdə özünü göstərir. Bunlardan birincisi banklararası vahid koordinasiya sisteminin zəif olmasıdır.
BBN.az xəbər verir ki, bu barədə AZƏRTAC-a açıqlamasında iqtisadçı-ekspert Eldəniz Əmirov bildirib.
Onun sözlərinə görə, hər bir bank öz daxilində müəyyən tədbirlər görməyə və tənzimləmə mexanizmləri formalaşdırmağa çalışsa da, bunlar banklararası koordinasiya şəklində həyata keçirilmir.
“Nəticədə banklarda kibertəhlükəsizlik standartları vahid texniki tələblər əsasında deyil, fərqli şəkildə tətbiq olunur. Eyni zamanda, bu sahə yüksək ixtisas tələb etdiyindən peşəkar kadr çatışmazlığı da institusional boşluğun əsas halqalarından biridir. Bu amillərin məntiqi nəticəsi olaraq real vaxt rejimində informasiya mübadiləsi baş tutmur. Məsələn, hər hansı banka qəfil kiberhücum olunduqda digər banklara məlumat ötürülmür, çünki belə bir mexanizm mövcud deyil”, – deyə Eldəniz Əmirov vurğulayıb.
Ekspertin fikrincə, qeyd edilən neqativlərin aradan qaldırılması üçün vahid koordinasiya sisteminin və bütün banklar üçün məcburi xarakter daşıyan standartların yaradılmasına ehtiyac var: “Bununla yanaşı, bütün bank işçiləri kibertəhlükəsizlik təlimlərində məcburi şəkildə iştirak etməli və bu standartların tələblərinə cavab verəcək səviyyədə fəaliyyət göstərməlidirlər”.
