“Enterprise Azerbaijan” portalı “Take Off Istanbul – 2023″də iştirak edib

İqtisadi İslahatların Təhlili və Kommunikasiya Mərkəzinin (İİTKM) operatoru olduğu “Enterprise Azerbaijan” portalının rəhbəri Mətanət Musayeva və meneceri Nəzrin Əkbərova “Take Off Istanbul – 2023” startap sammitində (texnofest) iştirak ediblər.

“Enterprise Azerbaijan” bu sammitə Türkiyə Texnologiya Komandası Vəqfinin özəl dəvəti əsasında “Texnofest Azərbaycan” müsabiqəsinin qalibi kimi qatılıb. Tədbirdə “Enterprise Azerbaijan” portalının fəaliyyəti təqdim olunub, beynəlxalq investorlar ilə əməkdaşlıq imkanları müzakirə edilib. Portalın rəhbəri M.Musayeva sammitdə təqdim edilən innovativ layihələrlə tanış olub və süni intellekt sahəsində seçilən beynəlxalq layihələri “StartUp School 2 – AI for Karabakh” müsabiqəsində iştirak etmək üçün Azərbaycana dəvət edib.

Xatırladaq ki, “Enterprise Azerbaijan” portalının rezidenti olan “Ecofriendly” komandası 2022-ci ildə Bakıda keçirilmiş “Texnofest Azərbaycan” müsabiqəsində “Ecoprint” layihəsi ilə “Yaşıl texnologiyalar” kateqoriyasında III yerin qalibi olmuşdu.

Qeyd edək ki, bu il 6-cısı keçirilən “Take Off Istanbul” startap sammitinə ümumilikdə 43 ölkədən 1252 müraciət daxil olub. Bunlardan toxum öncəsi, erkən və inkişaf mərhələlərində olan 200 yerli və xarici layihə müsabiqə mərhələsinə buraxılıb. Startapçılar həmçinin sammit çərçivəsində 100-dən çox investorla görüşmək və ideyalarını izah etmək imkanı əldə ediblər.