Gəncə və Bərdədə keçirilən əmək yarmarkalarında 250-yə yaxın vakansiya təqdim edilib

2

Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi tərəfindən bölgələrdə əmək yarmarkalarının təşkili davam etdirilir.

Növbəti əmək yarmarkaları Gəncə və Bərdədə keçirilib.

Gəncə-Daşkəsən Regional Məşğulluq filialı tərəfindən Gəncə şəhərində təşkil edilən aktiv məşğulluq tədbiri Peşə Təhsili üzrə Dövlət Agentliyinin və “ASAN Kadr” karyera mərkəzinin dəstəyi ilə baş tutub. Yarmarkada 28 müəssisə iştirak edib və 145 vakansiya təqdim edilib.

Qarabağ Regional Məşğulluq filialı tərəfindən Bərdə şəhərində təşkil edilən yarmarkada isə 10 müəssisə tərəfindən 98 vakansiya təqdim edilib.

İşəgötürənlər tərəfindən vakansiyalara müraciət edən şəxslərin CV-ləri qəbul edilərək nəzərdən keçirilib, uyğun namizədlər növbəti mərhələyə dəvət olunacaqlar.

Tədbirdə həmçinin işsiz və işaxtaran şəxslərə Agentliyin aktiv məşğulluq istiqamətləri və müraciət qaydaları barədə də məlumat verilib.