Qlobal enerji təhlükəsizliyinin mərkəzində yerləşən Hörmüz boğazında hərbi və diplomatik gərginlik yeni mərhələyə qədəm qoyur. BBN.az xəbər verir ki, ABŞ-ın regiondakı hərbi əməliyyatları və yeni hücum planlarını təxirə salmasından sonra, rəsmi Tehran strateji su yoluna nəzarəti daha da sərtləşdirməyə başlayıb. İranın xarici işlər naziri Abbas Araqçi bəyan edib ki, ticarət gəmilərinin təhlükəsiz keçidi yalnız İran hərbi qüvvələri ilə tam koordinasiya şəraitində mümkündür. Bu addım faktiki olaraq boğazın idarəedilməsində Tehranın üstünlüyünü nümayiş etdirir və beynəlxalq dəniz nəqliyyatı üçün yeni qaydalar diktə edir.
Vaşinqtonun hücum planlarından imtina etməsi bazarlarda qısamüddətli rahatlıq yaratsa da, İranın boğazdakı nəzarəti gücləndirməsi enerji tədarükü zəncirindəki riskləri gündəmdə saxlayır. Xüsusilə ABŞ-ın İran limanlarına tətbiq etdiyi hərbi blokadanın hələ də qüvvədə qalması tərəflər arasındakı “etimad böhranını” dərinləşdirir. Analitiklər bildirirlər ki, Hörmüz boğazının tam və maneəsiz açılması istiqamətindəki diplomatik cəhdlər hələ ki kövrək xarakter daşıyır və hər iki tərəfin hərbi mövqelərini qoruması qlobal neft bazarlarında volatilliyin (dalğalanmanın) davam edəcəyindən xəbər verir. Hazırda regiondakı bu “soyuq müharibə” şəraiti dünya iqtisadiyyatı üçün əsas qeyri-müəyyənlik faktoru olaraq qalır.
