KOBİA ilə Belarus Ticarət və Sənaye Palatası arasında sənəd imzalanıb

Anlaşma Memorandumunda sahibkarlar arasında işgüzar əlaqələrin təşviqi, birgə tədbirlərin keçirilməsi, investisiya layihələrinin reallaşdırılmasında dəstək, biznes missiyaların təşkili, məlumat mübadiləsi kimi məsələlər öz əksini tapıb. 

Minsk şəhərində keçirilən Azərbaycan Respublikası ilə Belarus Respublikası arasında iqtisadi əməkdaşlıq üzrə birgə Hökumətlərarası Komissiyanın 14-cü iclası çərçivəsində Kiçik və Orta Biznesin İnkişafı Agentliyi (KOBİA) və Belarus Ticarət və Sənaye Palatası arasında əməkdaşlığa dair Anlaşma Memorandumu imzalanıb.

Sənədi KOBİA-nın İdarə Heyəti sədrinin birinci müavini Natiq Həsənov və Belarus Ticarət və Sənaye Palatasının sədr müavini Denis Meleşkin imzalayıblar.

Memorandumda hər iki ölkənin sahibkarları arasında işgüzar əlaqələrin təşviqi, qarşılıqlı maraq doğuran birgə tədbirlərin keçirilməsi, investisiya layihələrinin reallaşdırılmasında təşkilat və iş adamlarına dəstəyin göstərilməsi, iqtisadiyyat və ixrac imkanları ilə tanışlıq məqsədilə biznes missiyaların təşkili, tədbirlər, xarici iqtisadi fəaliyyət sahəsində qanunvericilik aktları və əməkdaşlıqda maraqlı olan potensial tərəfdaşlar barədə məlumat mübadiləsi və s. istiqamətlərdə tədbirlər nəzərdə tutulur.