Dünya bazarında neft qiymətləri ardıcıl üçüncü gündür ki, eniş tendensiyasını davam etdirir. Buna əsas səbəb ABŞ və İran arasında Hörmüz boğazında gəmiçiliyin bərpası ilə bağlı aralıq razılaşmanın əldə oluna biləcəyinə dair yaranan ümidlərdir. Qətərin vasitəçiliyi ilə Vaşinqton və Tehran arasında mövqelərin yaxınlaşdırılması istiqamətində aralıq təklifin hazırlandığı bildirilir. Qlobal neft və LNG daşımalarının təxminən beşdə birinin keçdiyi Hörmüz boğazında naviqasiyanın bərpası ehtimalı təchizat narahatlıqlarını səngitsə də, bölgədəki kövrək təhlükəsizlik və ticarət gəmilərinə edilən son hücumlar bazardakı ehtiyatlılığı qoruyub saxlayır. Digər tərəfdən, ABŞ-da neft ehtiyatlarının gözləniləndən çox artması da qiymətlərə təzyiq göstərən digər amillər sırasındadır.
