Rusiya-Ukrayna konfliktləri dünya iqtisadiyyatının bir çox fərqli sahəsinə kəskin mənfi təsir göstərib. Bankçılıq sektoru, xüsusilə də Avropa bankları bu təsirlərdən yan ötməyib. Avropanın qabaqcıl banklarının səhmləri ortalama 7%-lik bir geriləməyə məruz qalıb.
Xüsusi olaraq, Rusiya Federasiyasında əməliyyatlarının çoxluğu ilə seçilən bankların ən çox zərərə məruz qalması müşahidə edilib. Avstriyanın “Raiffeisen Bank International” maliyyə qurumu 13.8%-lik geriləmə yaşayıb. Fransa mərkəzli “Societe Generale” 11.1%, İtaliya mərkəzli “UniCredit” isə 9.7% dəyər itirib. Moskva şəhərində təzəlikcə filial açan alman “Deutsche Bank” 9.5% geriləyib.
Digər tərəfdən isə, Rusiyanın ən böyük bankı olan “Sberbank” xaricdə yerləşən törəmə qurumları ilə bağlı çətinliklər yaşayır. Belə ki, bankın Xorvatiya və Sloveniyada yerləşən banklarından istehlakçıların sürətlə öz vəsaitlərini çəkməsi səbəbindən, bank sözügedən törəmə qurumlar üzrə gündəlik məxaric limitini müvafiq olaraq 1000 və 400 avro olaraq müəyyənləşdirib. Bununla yanaşı, “Sberbank” Xorvatiya, Sloveniya, Macarıstan, Serbiya və Bosniya Herseqovinada yerləşən törəmə qurumlarını Serbiyanın “AIK” bankına satmaq ilə bağlı razılığa gəlib.
Reuters