ABŞ Prezidenti Donald Trump İranı nüvə razılaşmasına məcbur etmək üçün məhdud hərbi zərbə variantını nəzərdən keçirir. Bu barədə The Wall Street Journal məlumat yayıb. Məlumata görə, ilkin mərhələdə az sayda hərbi və ya hökumət obyektlərinə yönəlmiş hücum planlaşdırıla bilər. Məqsəd – Tehranın uranın zənginləşdirilməsini məhdudlaşdırmasına nail olmaq və eyni zamanda diplomatik kanalları tam bağlamamaqdır. Tramp bildirib ki, növbəti addımlarla bağlı qərarını təxminən 10 gün ərzində verəcək. Mənbələrin sözlərinə görə, Ağ Evdə həm məhdud zərbə, həm də daha genişmiqyaslı əməliyyat ssenariləri müzakirə olunur. Lakin yekun qərar hələ verilməyib. ABŞ rəsmiləri xəbərdarlıq edir ki, istənilən zərbə İranın sərt cavabına səbəb ola və Vaşinqtonu Yaxın Şərqdə daha geniş münaqişəyə sürükləyə bilər. İran isə mümkün hücuma “güclü cavab” verəcəyini bəyan edib. Ümumilikdə isə geosiyasi risklərin artması fonunda enerji bazarlarında gərginlik yüksəlir. Analitiklər bildirirlər ki, regionda hərbi eskalasiya ehtimalı qlobal enerji və maliyyə bazarlarına ciddi təsir göstərə bilər. Hadisələrin inkişafı dünya bazarları tərəfindən də diqqətlə izlənilir.
