Türkiyənin müdafiə sənayəsi ixracında Azərbaycanın böyük payı var

Türkiyə Respublikası 2021-ci il üzrə ixracat göstəricilərini açıqlayıb. Hesabata istinadən, Türkiyədə 2021-ci ildə ixracatda 32.9%-lik artıma nail olunub. Belə ki, 2020-ci ildə 170 milyard dollar civarında dövr edən ixracat səviyyəsi 2021-ci ildə 225.36 milyard dollardan yüksək olub. Türkiyə Prezidenti Rəcəb Tayyip Ərdoğan bu barədə açıqlamasında, 2022-ci il üçün ixracın səviyyəsinin 250 milyard dollara qədər artırılmasının planlaşdırıldığını vurğulayıb. İqtisadi artım isə 5% civarında proqnozlaşdırılıb.

Türkiyənin 2021-ci ilin dekabr ayında ən çox məhsul ixrac etdiyi ölkələr Almaniya ($1.635 milyon), ABŞ ($1.327 milyon) və Birləşmiş Krallıq ($1.285 milyon) olub. Sözügedən ölkələrə ixracın 2020-ci ilin eyni dövrünə nisbətdə artım göstəricisi isə müvafiq olaraq 14%, 33% və 21% olub. Sektoral nöqteyi-nəzərdən isə, ixracda 2021-ci ildə ən böyük artım qeydə alınan sahə qiymətli daş-qaşlar olub. Belə ki, mücəvhər ixracı 2020-ci il ilə nisbətdə 79.5% artaraq 6.781 milyon dollar səviyyəsində qərarlaşıb.

Hesabatda diqqət çəkən başlıca sahələrdən biri müdafiə sənayəsi məhsullarının ixracıdır. 2021-ci ildə ixracatda 40%-dən çox artıma nail olan bu sektorun ümumi ixrac həcmi 3.224 milyon dolları ötüb. Müdafiə sənayəsi məhsullarının ixracında qeyd edilən ölkələrə nəzər saldıqda, Azərbaycanın ABŞ-dan sonra ikinci yerdə qərarlaşdığını görmək olar. 2020-ci ildə Türkiyədən 260.8 milyon dollar, 2021-ci ildə isə 202.2 milyon dollar həcmində hərbi texnika idxal edən ölkəmiz ümumi sektoral ixracın 6%-dən çoxunu özündə cəmləşdirir. Türkiyədən Azərbaycana hərbi sənayə məhsullarının ixracında başlıca yeri Bayraktar TB2 pilotsuz uçuş aparatı tutur.