Dünyanın ən məşhur investorlarından biri olan Warren Buffettin qurduğu Berkshire Hathaway uzun fasilədən sonra yenidən səhmlərinin geri alınmasına (buyback) başlayıb. Şirkət bu addımı 2024-cü ildən bəri ilk dəfə atıb və bu, investorlar üçün mühüm siqnal hesab olunur.
Ekspertlərin fikrincə, şirkət adətən yalnız o zaman geri alış edir ki, səhmlər real dəyərindən ucuz qiymətləndirilmiş olsun. Bu isə bir çox investor tərəfindən “alış üçün yaşıl işıq” kimi qiymətləndirilir.
Son illərin statistikası:
* 2023 – təxminən 9 milyard dollar dəyərində səhmlər geri alınıb
* 2024 – təxminən 3 milyard dollar
* 2025 – heç bir geri alış olmayıb
Müqayisə üçün, 2020-2022-ci illərdə şirkət ümumilikdə 60 milyard dollarlıq öz səhmini geri almışdı.
Geri alış nə deməkdir?
Şirkət bazardan öz səhmlərini aldıqda dövriyyədə olan səhmlərin sayı azalır. Nəticədə mövcud səhmdarlar şirkətin gəlirlərindən daha böyük pay əldə edir.
Analitiklər bildirir ki, bu addım Berkshire Hathaway səhmlərinin hazırda bazarda daha sərfəli qiymətə ticarət oluna biləcəyinə işarə edir.
